Bosh sahifa » Bilasizmi? » Demodam yurishi

Demodam yurishi

DEMODAM YURISHI – salavkiylardan Salavk I va Antiox sarkardasi (strategi) Demodamning Sirdaryo ortidagi yerlarga (taxminan hozirgi Toshkent vohasi) yurishi (miloddan avvalgi taxminan 293–280 yillar). Qadimda Sirdaryoni (uni yunonlar Yaksart, Tanais deb atashgan) Yevropani Osiyodan ajratib turuvchi chegara deb hisoblashgan.

Salavk I o‘zining Osiyodagi mulklarini kengaytirish niyatida razvedka maqsadida Demodamni Sirdaryo ortiga harbiy safarga jo‘natgan. Tarixchi Pliniyning yozishicha, Demodam yurishi natijasida Sirdaryo ortida ko‘plab yirik qabilalar: saklar, massagetlar, daylar, issedonlar, ariaklar, rimniklar, peziklar, amardlar, istlar, yedonlar, qanlar, kaniaklar, yevxarlar, katiarlar, antuisianlar, psaklar, arimasplar, antakatlar, xroazarlar, oyklar, napeylar, paleylar kabilar yashashi ma’lum bo‘lgan. Daryoni mahalliy aholi Silis deb atagan, aholining turmush tarzi parfiyaliklarnikiga o‘xshash bo‘lgan.

Ba’zi olimlar (Yu.F.Buryakov) fikricha, Qanqa shahri xarobasi Demodam yurishidan so‘ng bunyod etilgan «Yaksartorti Antioxiyasi» shahri o‘rnida joylashgan.

«Toshkent» ensiklopediyasi. 2009 yil

O‘xshash maqola

“Taraqqiy”

Post Views: 167 “Taraqqiy” – jadidlar gazetasi. 1906 yil 14(27) iyundan Toshkentda chop etilgan. Noshiri …

Fikr bildirish

Email manzilingiz chop etilmaydi. Majburiy bandlar * bilan belgilangan