“Хадичаи Кубро” мадрасаси

“Хадичаи Кубро” аёл-қизлар ўрта махсус ислом билим юрти 1993 йили “Эшон Бобохон” номи остида ўз фаолиятини бошлади. Билим юртида Ўзбекистон Республикаси вилоятлари, Қорақалпоғистон Республикаси мусулмонлари учун ўрта маълумотли диншунос, одобнома, бошланғич араб тили ўқитувчиси тайёрланади. Ўзбекистон мусулмонлари идораси Олий ҳайъатининг 1998 йил 15 июлдаги мажлис қарори асосидаги № 295-сонли бўйруғи билан “Хадичаи Кубро” номига ўзгартирилди ва “Хадичаи Кубро” аёл-қизлар ўрта махсус ислом билим юрти номи остида ўз фаолиятини давом эттириб келмоқда.

Билим юрти 1998 йил 10 августда Ўзбекистон Республикаси Адлия вазирлиги томонидан қайта рўйхатдан ўтган. 1998 йили Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитанинг рухсатномаси билан ишни давом эттирган.

Билим юртининг асосий мақсади динлар тарихи ва назариясини чуқур эгаллаган, ислом дини асосларини ўзлаштирган, инсонпарварлик, халқпарварлик ва ватанга садоқат руҳида тарбияланган, ўрта махсус маълумотли исломшунос мутахассислар тайёрлашдан иборатдир.

2000-2001 ўқув йилидан бошлаб, билим юрти давлат стандартига ўтгани сабабли умумтаълим фанлар химия, физика, астрономия, математика ва биология фанларига катта эътибор берилмоқда. Мутахассислик фанлари: Қуръони Карим ва тажвид, фиқҳ, ақоид, тафсир, араб тили фанларида гуруҳдаги талабалар иккига бўлиниб ўқитилмоқда.

1993 йилдан 1999 йилгача сиртқи бўлимни 230 нафар талаба битирди. Ҳозирги кунга қадар 500 дан ортиқ талабалар ушбу билим юртида диний ва дунёвий билимларни эгаллаб, мутахассисликлари бўйича ўз дипломларига эга бўлдилар.

Билим юртига Ўзбекистон Республикасининг барча вилоятлари ва Корақалпоғистон Республикасидан 9-синфни битирган таянч маълумотли аёл-қизлар муайян синов асосида талабаликка қабул қиланади.

Билим юрти Тошкент шаҳар, Учтепа тумани, Ўрикзор даҳаси, Зарафшон кўчаси 15-уйда жойлашган.

Билим юрти ўз фаолиятини Ўзбекистон Республикасининг Конституцияси, “Виждон эркинлиги ва диний ташкилотлар ва таълим тўғрисида”ги қонун ҳужжатлари, Ўзбекистон мусулмонлари идораси қарор ва кўрсатмалари асосида олиб боради.

Талабаларга 19 нафар мударриса дарс бермоқда. Уларнинг барчалари олий маълумотли.

Ўқиш муддати 4 йил.

Ўқув режаси ва талабларини тўлиқ бажарган, битирув имтиҳонларини муваффақиятли топширган талабаларга мазкур билим юртини битирганлик тўғрисида бошланғич араб тили мураббийси, диний маърифий ва маънавий-аҳлоқий тарбия масалалари малаҳатчиси дипломи берилади.

Хадичаи Кубро аёл-қизлар ўрта махсус ислом билим юрти диний таълим фаолиятини олиб бориш учун зарур шароитларга эга. Билим юрти ўз фаолиятини Ўзбекистон мусулмонлари идорасининг Махсус жамғармаси ва талабалар билан тузилган шартномалар асосида тушган маблағлардан олиб боради.

Талабалар дарсликлар ва ўқув қуроллари билан таъминланганлар.

Билим юрти икки қаватли бинода жойлашган бўлиб, жами 10 та ўқув машғулот хоналари, шу жумладан 5 та фан хонаси, кутубхона, компьютер хонаси, маъмурий хоналар, маънавият ва маърифат хонаси, бундан ташқари тикувчилик хонаси, ошхона, ётоқхона ва бошқа ёрдамчи хоналар мавжуд.

Билим юртида 2000-2001 ўқув йилидан бошлаб, узлуксиз таълим Давлат стандартлари ва ўрта махсус касб-ҳунар таълими стандартлари асосида ишлаб чиқилган ўрта махсус ислом билим юртлари таълим стандарти жорий этилган.

Моддий техника базаси ва кутубхона фонди йилдан йилга бойитиб борилмоқда. Кутубхона фонди 16 647 дона китобни ташкил этади.

Талабаларга диний ва дунёвий таълим бериш билан бирга тикувчилик, тўқувчилик, ошпазлик каби ҳунарлар ҳам ўргатилади.

Билим юртига кириш учун қуйидаги ҳужжатларни тақдим этишлари керак:

— билим юрти мудири номига ариза;

— маълумоти ҳақида ҳужжат (асли);

— яшаш жойидаги масжид имомидан йўлланма (ёки махалла оқсоқолидан тавсифнома);

— соғлиғи ҳақида тиббий маълумотнома (У-086-шаклида);

— 6 дона 3×4 ҳажмда фотосурат;

— туғилганлик ҳақида гувоҳнома ёки паспорт нусхаси (асли кўрсатилади);

— яшаш жойидан маълумотнома;

Қуйидаги фанлар бўйича кириш имтиҳонлари топширилади:

— ўзбек тили ва адабиёти (диктант);

— маънавият ва маърифат (тест);

— чет тили (тест);

— тарих (тест).

Изоҳ: қабул имтиҳонлари материаллари тўкқиз йиллик мактаб дастури асосида тузилади. Бу имтиҳонга катнашишдан аввал суҳбатдан ўтиш керак, суҳбатда 5 та савол берилади, 3 тасига тўғри жавоб берилса, имтиҳонга қатнашишга изн берилади.

“Хадичаи Кубро” аёл-қизлар ўрта махсус Ислом билим юрти манзили:

Тошкент шаҳри, Учтепа тумани, Ўрикзор даҳаси, Зарафшон кўчаси, 15-уй.
Тел: 299-24-11.

Манба